خبرونه

د ښاري اوبو رسولو او فاضلابو امارتې شرکت لوی رئیس مولوی غلام الرحمن «کظیم» د جوزجان ولایت د والي ښاغلي قاري ګل حیدر «شفق» سره د یاد ولایت اوسیدونکو ته د ښو چوپړتیاوو وړاندې کولو او د اوبو رسولو د پروژو ساتنې، وسعت او لا ښې همغږی په موخه ولیدل.

په دغه لیدنه کې د شرکت لوی رئیس ښاغلي مولوي غلام الرحمن «کظیم» د اوبو رسولو امارتې شرکت د لاسته راوړنو، پروژو او کړنو په اړه د ولایت مقام رهبری ته مفصل معلومات وړاندې کړل، او د یاد ولایت اوسیدونکو ته د اوبو رسولو شبکو د پروژو پراختیا په برخه کې یې د لا زیاتې مرستې غوښتنه کړه.

په همدې لیدنه کې د جوزجان ولایت والي ښاغلي قاري ګل حیدر «شفق» په داسې حال کې چې د ښاري اوبو رسولو امارتي شرکت د رهبری مقام او مسؤلینو د نه ستړی کیدونکو هڅو ستاینه یې وکړه، د یاد ولایت اوسیدونکو ته د څښاک پاکو اوبو پر اهمیت خبری وکړې او یادونه یې وکړه چې ولایت مقام ښاریانو ته د څښاکو د پاکو اوبو په برابرولو کې د دوامدارې مرستې ته تیار دی.

د ولایت مقام رهبری له ملاقات وروسته د شرکت لوی رئیس ښاغلي مولوی غلام الرحمن «کظیم» د شبرغان د اوبو رسولو دکار لاندې لویې پروژې او نورو تولیدي او توزیعي پروژو له تأسیساتو او په دغه ولایت کې د اوبو رسولو د نورو سرچینو څخه لیدنه وکړه او د اوبو رسولو د ښه چوپړتیاوو د لا ښه والې لپاره یې لازمې لارښوونې وکړي.