خبرونه

د ښاري اوبو رسولو او فاضلابو امارتي شرکت لوی رئیس ښاغلي مولوي غلام الرحمن کظيم د یاد شرکت عملیاتي رئیس ښاغلي انجنیر نصیر احمد احمدي په ملتیا د قرغې بند د اوبو تولید او لیږد پروژې، تولیدي مرکزونو او د کابل ښار د دوهم او اووم زون له امیریتونو څخه لیدنه ترسره کړه.

د شرکت لوی رئیس د قرغې بند څخه د کابل ښار باغ بالا لس زره متر مکعب ذخیرې ته د اوبو د لیږد پروژې د کاري پروسې څخه د لیدنې ترڅنګ د پروژې پلی کوونکي شرکت له مسؤلینو سره ولیدل او پر ټاکلي وخت د پروژې د پای ته رسولو تاکید یې وکړ.

همدارنګه د شرکت لوی رئیس له کاریزونو، اوبو د تولید څاه ګانو او د کابل ښار د دوهم او اووم زون له امریتونو څخه د لیدنې او د اوبو رسولو شرکت له کارکوونکو د ستونزو، پلانونو او وړاندیزونو اوریدلو ترڅنګ یې وعده وکړه چې د هغوي په پلانونو او وړاندیزونو به هر اخیز بحث وشي، او په پای کې لوی رئیس هیوادوالو ته د لا ښه خدماتو وړاندې کولو په موخه اړینې لارښونې وکړې.