خبرونه

د ښاري اوبو رسولو او فاضلابو امارتي شرکت اجرائیوي رئیس ښاغلي مولوي غلام الرحمن کظیم د اوبو رسولو شبکو پراختیا، د اغیزناکو چوپړتیاوو وړاندې کولو او فاضلابو مدیریت په موخه د نړیوال بانک له استازو سره په آنلاین بڼه وغږید.

یاده ناسته چې د مرکزي رئیسانو په ګډون ترسره شوه د شرکت اجرائیوي رئیس د فاضلابو د مدیریت او اوبو رسولو شبکو د پراختیا په موخه د شرکت د پلانونو، فعالیتونو او برنامو په اړه د معلومات ورکولو ترڅنګ څرګنده کړه: د ښاري اوبو رسولو او فاضلابو امارتي شرکت د مسلکي ټیمونو او تجربه لرونکو انجنیرانو په درلودلو سره د هیواد د اکثرو ولایتونو کې د اوبو رسولو پروژې او فاضلابو تصفیه خونو سروې او ډیزاین ترسره کړی چې د تطبیق لپاره چمتو دي.

د شرکت اجرائیوي رئيس زیاته کړه د نړیوالو بنسټونو مرستې او همغږي د دې لامل کیږي چې هیوادوالو ته د اوبو رسولو چوپړتیاوې ګړندۍ او پراخې کړي.

په دوام کې د نړیوال بانک مرکزي دفتر د فاضلابو او اوبو رسولو څانګې مسؤل ښاغلي ژیمین ماو په هیواد کې د دې بنسټ د فعالیتونو د څرنګوالي په اړه معلومات وړاندې کړل او زیاته یې کړه: دا بنسټ د نورو نړیوالو بنسټونه سره په همغږۍ د بشر دوستانه مرستو په چوکاټ کې په لېرې پرتو سېمو او لویو ښارونو کې د اوبو رسولو او فاضلابو مدیریت په موخه برنامې په پام کې لري او هیله ده چې د اوبو رسولو شرکت په همغږۍ یادې برنامې تطبیق کړي.

په پای کې و ټاکل شوه چې په راتلونکو ناستو کې د همغږۍ څرنګوالي په اړه په تفصیل خبرې او اړینې پرېکړې وشې.