د ښاري اوبو رسولو او
فاضلابو دولتي شرکت لوی رئیس ښاغلي انجنیر نعمت الله احمدي د سره صلیب نړیوالې کمیټې
له استازو سره وکتل.
یاده ناسته چې په انلاین
او حضوري بڼه ترسره شوه؛ لومړی د اوبو رسولو لوی رئیس ښاغلي انجنیر نعمت الله
احمدي د سره صلیب د دفتر له همکاریو څخه د مننې ترڅنګ د شرکت د اړتیاوو، ستونځو،
او حل لارو په اړه وغږید او زیاته یې کړه: مونږ په نړۍ کې د اقلیم د بدلون شاهدان یو،
چې د یادو بدلونونو په ترڅ کې افغانستان هم د اوبو له اړخه اغیزمن شوی دی.
همدا رنګه د شرکت لوی رئیس
زیاته کړه: د ځمکې لاندې اوبو له زیرمو څخه ګټه اخیستنه د دې لامل شوي چې د ځمکې
لاندې د اوبو کچه ټیټه شي، مونږ اړ یو چې له دې وروسته د سطحي اوبو په انتقال کار
وکړو چې یاد کار لوړ لګښت غواړي.
په پای کې د سره صلیب
استازي ښاغلي سمیر الیاس، کپیل پرودهن او براه، په ۲۰۲۳ زیږدیز کال کې د ښاري اوبو
رسولو او فاضلابو دولتي شرکت سره د یادې کمیټې د همکارۍ په اړه لنډ راپور وړاندې کړ،
او په ۲۰۲۴ زیږدیز کال کې د سره صلیب د همکاریو د لمړیتوب په اړه معلومات ورکړل او
ژمنه يې چې یاده کمیټه به په روان کال کې هم د اوبو رسولو دولتي شرکت سره خپلو
مرستو ته دوام ورکړي.