د ښاري اوبو رسولو او فاضلابو دولتي شرکت لوی رییس ښاغلي انجنیر نعمت الله
احمدي، د شرکت عملیاتي رییس، حقوقي سلاکار، د دعوت او ارشاد ریاست تدریسي آمر او د
نشراتو او عامه اړیکو آمر په ملتیا، د کندهار لویې ویالې پروژې له کاري بهیر څخه
لیدنه وکړه.
د شرکت لوی رییس د یادې پروژې څخه د لیدنې پر وخت د کاري بهیر په چټک کولو
تاکید وکړ او دا پروژه یې د کندهار ښار اوسېدونکو لپاره خورا ارزښتمنه وبلله.
همدارنګه د شرکت لوی رییس د پروژې کاري بهیر چټک کولو اړوند نظریاتو او
وړاندیزونو د اورېدو تر څنګ وویل: د ستندرد پلي کول، په ټاکلي وخت کې د کار بشپړول
او روڼتیا او صداقت د یوې سمې پروژې له معیارونو څخه دي، چې په دې برخه کې به موږ
له هېڅ ډول هلو ځلو څخه ډډه ونه کړو.
د یادونې وړه ده، چې د کندهار ښار لویې ویالې پروژه، ۱۱۱ کیلومتره د اوبو
رسولو شبکه او د لویې ویالې سیمې انتقالي پایپ، یوه ۳۱۰۰ متر مکعبه ځمکنۍ ذخیره، یوه
۱۵۰ متر مکعبه ارتفاعي ذخیره، یوه د پمپ سټېشن ودانۍ، د جنراتور لپاره یوه خونه، د
ساتونکو لپاره یوه خونه، یو اداري تعمیر، د شپږو څاه ګانو کېندل، د څاه ګانو لپاره
شپږ خونې او د یادو تاسیساتو د ساتنې په موخه چارچاپېره دېوال رانغاړي، (۵۵۰۰۰)
مشترکین به د اوبو رسولو خدمتونو تر پوښښ لاندې راولي چې څهباندې (۴۵۰ میلیونه
افغانۍ) لګښت ورباندې راځي.