خبرونه

د ښاري اوبو رسولو او فاضلابو امارتي شرکت اجرایوي رئيس ښاغلي مولوي غلام الرحمن کظیم د عملیاتي چارو رئیس انجنیر نصیر احمد احمدي او د کابل زون رئیس انجنیر شفیع الله زاهدي په ملتیا پروان ولایت ته د سفر په ترڅ کې د یاد ولایت والي ښاغلي مفتي محمد ادریس انوري سره وکتل.
په دې لیدنه کې د پروان ولایت والي د څښاک صحي اوبو ته د پروان ولایت د اوسیدونکو د اړتیاوو په اړه وغږید او د اوبو رسولو امارتي شرکت رهبرۍ مقام له لورې یې وغوښتل ترڅو د دې ولایت اوسیدونکو د څښاک صحي اوبو تامین ته ځانګړې پاملرنه وکړي.
په دوام يې د ښاري اوبو رسولو او فاضلابو امارتي شرکت اجرایوي رئیس په راتلونکي کال کې د اوبو رسولو پروژو د پلانونو او د اوبو د تولید او توزیع د کچې په اړه معلومات وړاندې کړل او ژمنه یې وکړه چې په نږدې راتلونکي کې به په پروان ولایت کې د اوبو رسولو توزیعي او پراختیايي پروژو کارونه پیل شي.
په پای کې د شرکت اجرایوي رئیس د پروان ولایت اوبو رسولو آمریت تولیدي، توزیعي سایټونو او اوبو رسولو شبکو څخه لیدنه ترسره کړه او دې آمریت د کاري راپورونو او کاري خنډونو د اورېدلو ترڅنګ یې د ستونزو لمنځه وړلو او د چارو د چټکتیا په موخه اړینې لارښونې وکړې.