خبرونه

د ښاري اوبو رسولو او فاضلابو امارتي شرکت اجرائیوي رئیس ښاغلي مولوي غلام الرحمن کظیم د شرکت د فاضلابو د چارو رئیس انجنیر فایق الله جمال په ملتیا لغمان ولایت کي د فاضلابو د تصفیه خونو د اعمار په موخه د دې ولایت والي ښاغلي شیخ شیر احمد حقاني سره ولیدل.

په دې ناسته کې د اوبو رسولو امارتي شرکت اجرائیوي رئیس د مهترلام ښار او اداري کمپلکس لپاره د فاضلابو تصفیه خونو د موقعیت، سیستم، ډیزاین او د جوړېدو د څرنګوالي په اړه د لغمان ولایت محترم مقام ته بشپړ معلومات ورکړل، او له ولایت څخه یې غوښتنه وکړه چې د یادو پروژو په اعمار کې هر اړخیزه مرسته وکړي.

په دوام یې، د لغمان والي محترم شیخ شیر احمد حقاني د اوبو رسولو امارتي شرکت اجرائیوي رئیس او د فاضلابو د چارو رئیس ته ښه راغلاست وویلو، او ډاډ یې ورکړ چې د یادو تصفیه خونو په جوړېدو کې به د یادې ادارې ټول امکانات د اوبو رسولو امارتي شرکت په خدمت کې وي.

همداراز، د ولایت رهبرۍ د اوبو رسولو شبکو په پراختیا او ځانګړي ډول د سلطان غازي ښارګوټې د پاتې برخو د اوبو رسولو شبکو ترپوښښ لاندې راوستو ټینګار وکړ، چې د شرکت اجرائیوي رئیس ډاډ ورکړ چې په نږدې راتلونکي کې به د یاد ښار پاتې برخې هم د اوبو رسولو خدماتو ترپوښښ لاندې راولي.

په پای کې د شرکت اجرائیوي رئیس د فاضلابو د چارو رئیس په ملتیا له هغو سیمو څخه چې د فاضلابو د تصفیه خونو اعمار، د اوبو رسولو تولیدې او توزیعې شبکو لپاره تر پلان لاندې دي او اوبو رسولو تر پوښښ لاندې سیمو څخه لیدنه ترسره کړه.