خبرونه

د ښاري اوبو رسولو او فاضلابو امارتي شرکت اجرائیوي رئيس ښاغلي مولوي غلام الرحمن کظیم د شرکت عملیاتي رئیس انجنیر نصیراحمد احمدي په ملتیا کندز زون ته د سفر په ترڅ کې د تالقان ښار اوبو رسولو آمریت او خان آباد اوبو رسولو مدیریت څخه لیدنه ترسره کړه.

په دې ناسته کې چې د تالقان ښار اوبو رسولو آمریت کې ترسره شوه؛ د دې آمریت آمر او کارکوونکو د معلوماتو وړاندې کولو ترڅنګ د اوبو رسولو د لا ښو چوپړتیاوو وړاندې کولو په موخه خپل آندونه، ننګونې او وړاندیزون د شرکت د اجرائیوي ریاست له مقام سره شریک کړل.

د اوبو رسولو امارتي شرکت اجرائیوي رئیس ښاغلي مولوي غلام الرحمن کظیم ستونزو او ننګونو ته د رسیدګۍ د ژمنې ترڅنګ؛ په ټاکلي وخت کې د مسؤلیتونو سرته رسولو او د اوبو رسولو چوپړتیاوو د کمیت او کیفیت په لوړولو ټینګار وکړ.

په پای کې د شرکت اجرائیوي رئیس د عملیاتي رئیس او کندوز زون د رئیس په ملتیا د تالقان ښار اوبو رسولو آمریت او خان آباد اوبو رسولو مدیریت د تولیدي او توزیعي مرکزونو، سرچینو، د اوبو له ذخیرو، شبکو او نورو تأسیساتو څخه لیدنه ترسره او د ستونزو او خنډونو لمنځه وړلو په موخه اړینې لارښونې وکړې.