خبرونه

د ښاري اوبو رسولو او فاضلابو امارتي شرکت اجرائیوي رئیس ښاغلي مولوي غلام الرحمن کظیم د عملیاتي چارو رئیس انجنیر نصیراحمد احمدي او د کندز زون رئیس انجنیر نصرالدین نصرت په ملتیا د تالقان ښار اوبو رسولو آمریت له لیدنې وروسته د بدخشان ولایت فیض آباد ښار اوبو رسولو آمریت څخه لیدنه ترسره کړه.

د فیض آباد آمریت د کاري راپورونو د اوریدلو ناسته چې فیض آباد اوبو رسولو آمریت که ترسره شوه؛ د فیض آباد اوبو رسولو آمر ښاغلي ملا محبت الله د شرکت مشرتابه مقام ته د ښه راغلاست ویلو ترڅنګ د فعالیتونو، لاسته راوړنو، د هیوادوالو ته د څښاک د اوبو د تولید او توزیع د کچې په اړه معلومات وړاندې؛ او خپل آندونه، ستونزې او وړاندیزونه یې د شرکت له رهبرۍ مقام سره شریک کړل.

په دوام يې د ښاري اوبو رسولو او فاضلابو امارتي شرکت اجرائیوي رئیس ښاغلي مولوي غلام الرحمن کظیم د دې آمریت له کړنو څخه د مننې ترڅنګ د ګټور مدیریت، د کاري بهیر چټکتیا او هیوادوالو د لا ښه خدمت په اړه چې د ټولو کارکوونکو ګډ مسؤلیت دی تأکیید وکړ، او د ستونزو او خنډونو د لمنځه وړلو په اړه یې اړینې سپارښتنې وکړې.

په پای د شرکت اجرائیوي رئیس د اوبیزو سرچینو، د اوبو رسولو توزیعي مرکزونو او نورو تأسیساتو څخه لیدنه وکړه، او د دې آمریت د امکاناتو ساتنه او له هغې څخه سالمه ګټه اخیستنه یې اړینه وبلله.