د ښاري اوبو رسولو
دولتي شرکت لوی رییس ښاغلي انجنیر نعمت الله احمدي هېوادوالو ته د اوبو رسولو د
خدمتونو چمتو کولو په موخه د بیاکتنې او نویو پلانونو او طرحو جوړولو لپاره شمال
او شمال شرق زونونو ته د سفر په دوام کې، د بدخشان ولایت په فیض آباد ښار کې د
اوبو رسولو درې پروژې، د شمال ختیځ زون رییس او مسوولینو، د دولتي ادارو استازو،
ځینو علماو، مشرانو او د فیض آباد ښار اوسېدونکو په ګډون سره په یو لړ مراسمو کې
پرانستې او ګټه اخیستنې ته یې وسپارلې.
دا مراسم چې د قرآن عظيم الشان په څو مبارکو ايتونو سره پيل
شول، د فیض آباد ښار اوسېدونکو ته د ښاري اوبو رسولو او فاضلابو دولتي شرکت لوی
رییس ښاغلي انجنیر نعمت الله احمدي د مبارکۍ تر څنګ زیاته کړه: په ولایتونو او په
ځانګړې توګه په فیض آباد ښار کې د اوبو رسولو د شبکو چټکه پراختیا د اوبو رسولو
دولتي شرکت د مسوولینو د زحمتونو او د دې ښار اوسېدونکو د همکارۍ او تشویق پایله
ده.
د شرکت لوی رییس د فيض آباد ښار له هغو اوسېدونکو څخه چې
د اوبو رسولو د شبکو په کېندلو او بېرته ډکولو کې ونډه اخيستې مننه وکړه او زیاته یې کړه: نه يوازې اوبه چې تر تاسو در رسېږي بلکې ټولې شبکې او نور توکي لکه ميترونه او پليټونه هم ستاسو دي، نو په ساتنه کې
یې هڅه کوئ او د اوبو رسولو د خدمتونو د دوام او پراختیا
په موخه پر وخت د اوبو لګښت په ادا کولو سره خپل مسوولیت ترسره کړئ.
دغه راز د ښاري اوبو رسولو دولتي شرکت لوی رییس د پرانيستل شویو درېیو
پروژو د جزیاتو په اړه معلومات وړاندې کړل ویې ویل:
د زيد بن ثابت (رض) د ګذر
د اوبو رسولو پروژه چې د فيض آباد ښار د شپږمې ناحیې په دشت قرغ سيمه کې موقعيت لري د (۷۰۰۰۰۰) اوه سوه زره
افغانيو په لګښت (۱۷۷۵) متره اوږدوالي سره له (۲۵۰۰) څخه
زيات هيوادوال تر پوښښ
لاندې رانغاړي.
د اوبو رسولو بله پروژه د فيض آباد نوي ښار پنځمه ناحیه کې موقعيت لري، دغه پروژه د (۶۵۰۰۰۰) افغانيو په لګښت د (۱۶۷۰) متره اوږدوالي سره له (۱۷۰۰) زيات مشترکین تر پوښښ لاندې رانغاړي.
او د (۵۶۸۲۰۴۹) افغانيو په لګښت له ښاري برېښنا سره د فيض آباد د اوبو رسولو د ادارې د څاګانو
د نښلولو پروژه، هېره دې نه وي یادې درې واړه پروژې د شرکت د داخلي بودیجې څخه تمويل شوي دي.